من أمس والضيقة.. تجول بخاطري المكسور
على غيمة سما حزني.. وتفكيري.. وهقواتي
وش اللي بدل أحوالي.. ظلامٍ ما غشاه النور
ظلام وخوف والشارع.. سمع حزني وخطواتي
أنا مدري وش اللي صار تبعثر عالمي المستور
ما بين أشيائي وأشياءك.. صعب القى قراراتي
كذا يعني ولا ندري.. وش اللي ما بقى يا سور
سوى ثلثين طينك..!! مع ترابك.. وغلطاتي
جلسنا ناخذ الذكرى.. على ذاك الحوي وندور
هنا..!! كانت علاقتنا... هنا..!! كانت نهاياتي
وش اللي ما بقى تكفى.. تعب يا حظي المغرور
رحلتي..!! وما رحل حزني... بقى يكتب معاناتي
نسيت إن العمر.. مرة.. نسيت إن الليالي تدور
ونسيت اخذ من العشرة.. صور.. باقي ملفاتي
على الذكرى تبي تبقى؟ تفضل يا حزن مشكور
هقيتك يا حزن تقوى!!.. وضاعت فيك هقواتي