ابشر بقلبٍ ما يبي غير طرياك
وأبشر بعينٍ ما تبي غير شوفك
وابشر بحبٍ لو قسى الوقت يرعاك
وابشر بروحٍ من غلاها تحوفك
ابشر وكل اللي تبي يالغلا جاك
آمر عسى درب المنايا يعوفك
يا صاحبي يا شين وقتي بلياك
لا صار ما ينطق لساني حروفك
إن غبت عني يذبح القلب فرقاك
وإن جيت يمي عانقتني طيوفك
امشي على كيفك على شان دنياك
واساير أيامك واقدر ظروفك
من كثر ما خوفي على القلب ينساك
سلمت لك قلب الغلا في كفوفك
مديت قلبي يوم مديت يمناك
ولعبت لك عرضة ورقصت سيوفك
لأجلك أزعّل باقي الناس لرضاك
وان مت تكفى يدفنوني بجوفك
لو تجرح قليبي وتكثر خطاياك
ارقد وآمن أمن الله خوفك
اليا قسى وقتك وشانت نواياك
قلي واموت برغبتك ومعروفك
قد قلت لك يا صاحبي ماقدر انساك
حلفٍ على روحي أبد ما تعوفك
تركي بن
عبدالعزيز