تِحسس شوفني يمكن بقايا العطر بثيابك
بقايا روح عطشانه، تناظر عمر يرويها
بعض من محبرة تبكي أسى من ظلمة اغيابك
بعض من هم مترمل على ضفة روابيها
وشوقٍ مكتحل حيره،، يباحث بينه اسبابك
يحاول يعصف بروحه يذللها ويشقيها
هواجس من رحل طيفك ابد ما فارقت بابك
تمني نفسها شوفك بعد غيبه يدفيها
وترسل كلها يمك،، عسى بس فيضها جابك
وحسيت انها حلمك ولا شيٍ يوازيها
تِفكر، انتبه،قرر،، وعيد او وازن احسابك
ولا تسوى تغيرها بشين ما يساويها
نِثار الروح في ظلك،، مع الأحلام يتشابك
مزيجٍ من حنين وحُب يبينها يواريها
مثل ومضة هوى غِره،، توسد همها اكتابك
مع الصفحات يتحرك شجونٍ في خوافيها
وينبض عمرها شُعله،، طفاها الغدر من صابك
تركها والغصن ذاوي على بعضه يوصيها
وصيه لو صحى قلبك،، تبدد معتمٍ شَابك؟!
ابي تذكر خفوقٍ ذاب لجل روحك يصحيها