تِحاول تِجمَع الصورة
تِحاول تِجمَع أشتاتك
قَبلها حَاول إتلاقي
بَعض ما ضَاعِ مِن ذاتِك
عَديم الشوق ما تِفهم
تِزيد.. تِعيد زلاتك
عَبث والله تِدور الحُب
تِحاول تِلقى ما فَاتِك
تِذكر؟ يومِ خَليتك؟؟
وإنته لازِم إسكاتك
ولا حَركتِ لي سَاكِن؟
ولا بانت لي عَبراتك؟
أنا مَدري أنا وشلون؟
أذوب إبصمتِ نَظراتك
غَريبة والله هَالدنيا
حياتك.. نَبضِ آهاتِك
حَسافة كِل يومٍ مَر
وأنا أعيشِ مأساتِك
أذوق المُر والعَلقم
واعاني في متاهاتك
تِحاول إيش؟
وتِجمع إيش؟
تِفضل ذوقِ حسراتِك
وإبقى في حَنايا الآآآه
وإحيا في مُعاناتِك
تِحمَل ضِيقة الأيام
وضِقة ناسِ شرواتك
تِعلم كيفِ تِبكي قَلب
وتِتمادى بِضحكاتك؟
تِقول إن الخَطا مِني؟!
ولكِن وينِ إثباتك
تَبي تِخدعني إبزيفك؟
وتَسرد لي حِكاياتك؟
قِديمة لِعبتك هَاذي
غير مِن مساراتِك
وهَذا كَاسِ مِن دَمي
عشان إطيبِ سَكراتك
حَاول تِِجمع الصوره؟!
إذا هَالحِلمِ مَلهاتِك
وحاول تِبتسِم للجَرح
وحاول تِلهي أوقاتِك