ياليل الأسئلة ضاق الجواب ومابقى استفسار
انا حبري جفاف .. وكل قحطٍ يسكن أوراقي
ياليل الوحدة اسدلت الظلام .. وغابوا السُمّار
ولاغيرك نديمي هاالهموم .. وْوحدك الساقي
تهادى البوح ياصدري .. يفتش جعبة الاسرار
وتمادى النوح ياجْفوني .. يذلّل عزة أحداقي
يذوب ادنى الكلام وتنطفي بي جذوة الإصرار
وألوذ بْصمتي المطبق .. وألملم عبرة الشاقي
انا الموسوم بالحيره .. وانا اللي ماعرف يختار
ولكنّ الحزن مااختار له موطن سوى أعماقي
انا ياما هقيت .. اني أبَوقَف .. وقفة المغوار ..
بوجه الصعب .. لكنّي صحيت بْخيبة الهاقي
صحيت افتش أوراق العمر أبحث عن الأعذار
وألاقيني بنفس الحيره اللي دايم ألاقي
تعبت أسأل ألين انه تهاوى فكري المحتار
ياليل الأسئلة جف الحبر مات أخضر أوراقي