هيه ياالخطوات ماللعابر احلامٍ تقوده
لارمى للدرب حزنه وألبسه ثوب النكاده
ياجراحي والفرح عن دنيتي معلن صدود
ياكفاحي مالقى المتعوس ثمره لإجتهاده
واقعي سجن العذاب وياسي المطبق قيوده
والفكر تايه في غيّه .. مابقت ذرة إفاده
لاوطن يحضن ضياع المغترب يحفظ وجوده
لا أمن من ليلي الموحش ومن خنقة سواده
راحل ل اللانهايه .. رحلةٍ .. من دون عوده
تاركٍ كل شي ورايه .. والسفر قادح زناده
ولا ذكرتك اذكر أجمل حب صادق في وعوده
حب راسخ في دواخلنا .. ومن اول مهاده
والمكان اللي فتح صدره لنا واوثق عهوده
مافصخ سر القلوب المفعمه شوق وسعاده
وكل ذكرى اذكرك فيها أرى إنسانه ودوده
غادةٍ تسكن فؤادي بس عن مليون غاده
طالبك لامربك طرياي .. والغربي يقوده
أو لفاكِ طيفي الغايب .. ويحضنْكِ وداده
قولي انه كان يغليني .. ويهديلي وروده
يحتصني يمسح دموعي ويدّه لي وساده
اذكري "محمد" حنانه تضحياته مع صموده
إشتياقه إعتذاره .. حتى في قمة عناده
واعذريني فكري المشلول غارق في جموده
وسامحيني مابقى فيني طموحٍ أو إرادة
"محمد" اللي تخبرينه إنتهى .. وإنْحَت عوده
ماله اللي الدمع سلوى والحزن شربه وزاده
ماترك للعالم الا صمته المطبق .. شروده
مااخذ من دنيته الا التحمل .. والجلاده