يا وجود الشايب اللي ما حدٍ قدر وقوفه
قام كلٍ ينهره والعود ثابت في مكانه
بيّنٍ ضعفه وثقله في المسير وقلّ شوفه
والزمن دوّار والأيام ما فيها ضمانه
ضيّقته تبدي ويدفنها ويكتمها بجوفه
من تعابيره يُرى هذا زمن ما هو زمانه
احترامه للنظام بوقفته داخل صفوفه
والشهامة والحياة تمنعه ما يطلق عنانه
والله إنه ما يلام إذا تلعثم في حروفه
أو يكرر في عباراته وأعاد الأسطوانة
الذي مثله علينا واجب نقدّر ظروفه
نحشمه ونوقّره ونحط له قدر ومكانه
والتعامل بالهدوء وبالتلطف والمروفة
والتغافل لو حصل كلمة وزلّ به لسانه