معقولة

معقولة.؟..

لأ. ما تصدقيش

هو انتِ فاكرة ان الزمن هيقول خلاص للعاشقين.؟

شطبنا عشق ومعشقة، فركش، ورانا أكل عيش

تبقي انتِ لسه ما تعرفيش.

إن النجوم لسه أهي مالية السما

والأرض بتدور، والقمر بيشر نور.. ما ينتهيش

والدنيا لسه ما انتهت، لما انتهى مشوارنا بدري

ولسه انا مكتوب لي اعيش

وان كنت مش عارفة اعرفي

ان الهوى عنصر أساسي للحياة

من غيره يعني ما فيش بشر يقدر يعيش

واني أنا.. لسه على قيد الحياة

وأكيد، أكيد، هاعشق.. وأعيش

اللي انت لسه ما تعرفهش كتير أوي

كان عندي كوم أحلام كبيييير... آاااد الجبل

شايله عشانك من زماااااااان..

من قبل ما يؤون اللقا بكتييييير أوي

مهما هناخد منه يكبر، والأمل

خلاه يزيد، ما ينتهيش

عندك مثل

يمكن في لحظة يفكرك، ويعقلك

يعني في يوم.

كان ليا حلم أكون أنا سلطان على قلبك.. ملك

أأمر، وقلبك يستجيب.

مولايا، لبيك، كلي لك

طلبك مجاب مهما يكون، ما يهمنيش.

وانتِ الأميرة شهرزاد

على عرش قلبي.. أمرها لا يسترد، ولا يعاد

وانا قلبي وحده بين ملايين القلوب

رهن الإشارة.. بالمراد

لو تطلبي طلبك ف لحظة يُستجاب

من غير مافيش

ما فيناش مافيش

ما هو أصلك انتِ ما تعرفيش

إني أنا شاعر..

.. وعقلي في الهوى طاقق، ماليش

عند اللزوم والجد حد..

.. وأي حد ف سكتي ما يحدنيش

ما دمت انا ما أذتش حد برغبتي

يبقى طبيعي الحد دا ما يأذنيش

واللا انتِ لسه ما تعرفيش.. يا شهرزاااااد؟

إن الحياة قسمة إلاه

والعشق فيها قسّمه رب العباد

يعني ماهوش منّة وجميلة لأيّ حد

من غيره يعني ما فيش قلوب تعرف تعيش

معقولة.؟.

فاكرة ان الزمن هيقول لغيرنا خلاص بقى.؟

شطبنا عشق ومعشقة، فركش..

ورانا أكل عيش؟

ما تصدقيش.

كل القلوب من بعدنا من حقها لازم تعيش

إنتِ اللي قلبك قسمتي، وحظي طلع

خايف يعيش

إنتِ اللي قلبك قسمتي، وحظي طلع

خايف يعيش..

خ..

... ا..

... يف...

... يع...

... يش

وما تزعليش