بفتح قلبي تا حاكيك

بِفْتَحْ قَلْبي تا حَاكيكْ

بْلاقيكْ بْقَلْبي مَوْجُودْ

بْأَسْهَلْ كِلْماتْ بْناجِيكْ

تا يِحْفَظْ كِلْماتي وْجُودْ

قَبْلي.. اللّي غَنُّوكْ كْتارْ

جْمَعْت غْنانيهُنْ كِلاَّ

بِكْتابي.. باقِةْ أَشْعارْ

بَرْكي بْيِرْحَمْني أَللَّه

يَسُوع الْ عَلَّمْني حِبّ

يا عَلِي.. مِتْجَسَّدْ فِيكْ

شَارَكْتُو بْآلام الصَّلْبْ

وْخِفَّفْت عْذابُو يا شْريكْ

مُشْ رَحْ فَسِّرْ.. حَكْيي مْفَسَّرْ

سَيِّدْنا مْحَمَّدْ شُو قالْ؟

إِنْتَ بْتِشْبَهْ عِيسى أَكْتَرْ

بَيْنو وْبَيْنَكْ وِحْدِةْ حالْ

بِالْقَناعَهْ.. غْلِبْت الفَقْرْ

وْما انْذِلَّيْت لْسِحْر الْمالْ

تْرَقِّعْ بِالصِّرْمايِه العُقْرْ

تا تْعَلِّمْ كلّ الأَجْيالْ

هْنِيَّال الْ شافَكْ عَنْ قُرْبْ

هْنِيَّال الْماشي بْدَرْبَكْ

قلتْ: الشَّرْق بْيِسْمَعْ غَرْبْ

وْبيشُوفُو.. صْدَقْت بْكتْبَكْ

ما خِفْت يْلاقيكْ الْمَوْتْ

لاقَيْتو.. وْسَيْفَكْ لامِعْ

أَللّه أَكْبَرْ.. صار الصَّوْتْ

يْأَدِّنْ.. وِتْرِدّ جْوامِعْ

يا فارِسْ جَنَّات الْخُلْدْ

مْلايِكْتَكْ كانوا يْحِبُّوكْ

غَزْلُولَكْ مِنْ نُورُنْ جِلْدْ

وْجُوَّاتْ عْيُونُنْ خَبُّوكْ