أوقات نبكي و الدموع ادفق

أَوْقَاتْ نَبْكِي وْ الدمُوعْ ادَّفِقْ

وأَوْقَاتْ نَبْكَمْ وْيِشِيحْ مِنِّي الرِّيقْ

وأَوْقَاتْ نْحَسْ القَلْبْ بَاشْ يَخْفّقْ

وأَوْقَاتْ نَتْعَبْ مَا نْصِيبْ رْفِيقْ

وأَوْقَاتْ نَزْهَى فِي لَكْلَامْ انّطّقْ

وأَوْقَاتْ مْعَذَّبْ والْجْرَاحْ تْفِيقْ

ونَصْبَرْ عْلَ حَرْ الهْوَى وْنْحَدَّقْ

وأَوْقَاتْ نَشْقَى غِيرْ لَوْسَعْ نْضِيقْ

وأَوْقَاتْ قَلْبِي مِنْ الضِّيمْ تَا يَتْفَلِّقْ

بِينْ الكَذْبْ وْ الهْمُومْ طْرِيقْ

وأَوْقَاتْ لِيلِي وْالظلَامْ مْرَقْرَقْ

وأَوْقَاتْ صُبْحِي لَاحْ ضوْ رْقِيقْ

وأَوْقَاتْ نُهْرَبْ فِي الخْلَاءْ نَدّرّقْ

إِذَا الحُبْ شَفْتُو هَدْ لَمْعَاشِيقْ

كِي نْشُوفْ الحْبِيبْ قَلْبِي يَشْفَقْ

ولَفْرَاقْ خَلّفْ مِنْ كْوَاهْ حْرِيقْ

قَدَّاشْ يَا حُبْ مِنْ لَجْرَاحْ اتْفِيّقْ

يَنْزَفْ وْيَدَّفِقْ الدَّمْ زِيقْ بْزِيقْ

وَقْتَاشْ حُبِّي فِي سْمَانَا تْحَلَقْ

او وَقْتَاشْ نَسْبَحْ فِي لَغْرَامْ غْرِيقْ

اعْمَلْ جْمِيلَكْ وْ بِالَعْشِيقَةْ ارْفَقْ

لْعُودْ نَزْهَى كِيفْ لَمْخَالِيقْ