أنا وأنتِ
مشينا السكة للآخر
وف الآخر
بقينا بنفترق فينا
يا نبض القلب وسنيني
يا نور فى العتمة يرويني
وبرجع تانى أسألني
بعدنا ليه عن إمبارح؟
وليه يبقى الزمن جارح؟
وليه الحلم مش لينا؟
ومين فينا هيقدر يوم
يزيل الحاجز العازل
ما بين الصوت وترديده
ويبْدل نغمة الألحان
لصوت الموج على شطوطك
يمد عروقة يرويكِ
ويحييكِ يا غصن زَتون
ومين هيكون ف يوم فرحك
بيغزل من خيوط الشمس فستانك
علشانك...
سحبت عروقي من أيدي
وبشغل من حروف أسمك عناقيدي
وبنده ع النجوم قيدى
فى عتمة ليلى لو طوّل
وزينتك بتاج أبيض على جبينك
وبيضوّى بدقاتي
وحتة من السما الصافية بلون قلبك
وعمري يمدّ قدامك على السكة
بساط ممدود
يعدى لألف ألف حدود
دام الأول أنا وأنتِ ما بينا وعود
وحتما يجي يوم ونعود
لنفس السكة من تانى
عشقتك وأنتِ عشقانى