لسة الكتب فوق الرفوف
بتعانى وحدتها
وحروف بتحلم بالهروب
من سجنها
ياااا حزنها...
فك القيود
خليها تتنفس
وادّى البراح
للضى يدخل من جديد
يملى الخلايا الميتة بين السطور
وبفرحة الحرف اللى طاير
بين ورق زهر البنفسج
مكسور جناحك يا أمل مكسور
إزاى هتعلى
تعدى فوق السور
وتحرر الأوراق
وتكسر كل قضبان السطور
أنفض هموم الدنيا عن ريشك
أفرد جناحك
وأنطلق
طوق النجاة قدام
داوى جرااحك م الزمن
وعدى تجاعيدها
خلى الدموع تنشف على سطورك
وأقفل على الكلمات
بجلدتين من نور