ليه مش حقى

ليه مش حقى؟

أرتاح من ألمى

ولو لساعات

وأرجع أشوف الفرحة

ف قلب حزين وجريح لحظات

وساعات...

بيكون الدمع لحزن عنيّا عنيد

وبعيد

وألاقى النغم الساير

بين كلماتى اتملا بآهات

ليه مش حقى؟

أعيش من عمرى ولو أيام

واشوف العمر كحلم جميل

من بين أحلام

ارسمها ف عيني خطوط من نور

واموت..

لما اصحي ألاقى

الكون حوليا صبح أوهام

ليه مش حقى؟

يكون لي ف توب الفرحة مقاس

وألقى الناس حوليا تغنى وباحساس

ليه بنتغيّر،

وبنتحيّر،

حتى الناس مش هىّ الناس

حتى القلب صبح أحجار

وإنطفى منه بريق الماااس

لأ من حقى!

أعيش وهاعيش

وألقى الراحة من أحزانى

وأغزل توب الفرح مقاسى

والدمعة تتوه عن عنوانى

والأحلام ترجع وردية

والأوهام يومها هتنسانى

هتحداكِ يا دنيا وألاقى

الأشواق تسكن وجدانى