مدِّ الجذور اتمسكى بالروح
ل تروح غصونك ويّا دوامة خريف
محفورة فوق ضهر الورق أوجاع
مين اللى باع حلمك لآلة جزّ
قاتلة خَضار العُشب جواكِ
باكى عليكِ القلب يا شجرة ريحان
وأنا الغلبان..
ومالى ف صدها حيلة
لو مرت الأيام..
بمشي أنا لقدام ولا الزمن خداع
باعد خطاوى فرحتك
عن سكتك أميال
ودا مهما مال بِكِ الزمن
قلبى لعودك كالوتد
إن زادت الأحمال
بجمع بقايا زهرتك
وادفنها فى ضلوعي
أوجاعى يا أوجاعى يا أوجاع
من فين أجيبلك راحة لو تتباع
دا العمر لو كان ضاع
بإيديا عمر بيتولد
راسم على جبين السما أحلام