عفت كلشي و اجيتك و انت ما عفته
اثاري وياه ذاك الوكت خلصته
يل تجهل جروحك طعنتك بثنين
الويا خنت بية وياي هم خنته
يل مخسرني كل عمري المضه و الجاي
منطيتك عمر و بطيش طشرته
امعن بالنظر بية و تشوف انسان
كاسر خاطرة و ادريك ما شفته
هوه الما يشوف البيه شبت نار
يمته يشوف واحد حرگه كاتلته
چفي الچان يتوضه بندة الملگاك
واصابع چفك من ارد امشي شابگته
هوه خصر الجگارة و ذاك غصن الياس
من يوم الرحت مهجورة خاصرته
چنت اتنفسك من نلتقي قداح
وفراش يطوفنه و نستانس بلمته
واذا چان النسيم بريتي چن دخان
معناهه بغيابك هوه تنفسته
ومن يوم الرحت ذاك الورد ذبلان
ولحد هسه و لا فراشة واصلته
اجبر خاطر اجم وردة ظل مكسور
واترك خاطري الفراشة كاسرتة
احس بروحي ورقة و صارت النيشان
السهمك و الهوة الحركهه عاندته
لان بي ريحتك ما ردته يخطي الروح
النفس من چان سهمك جاي وگفته
ومن طعنات ظهري چفوف اديك انضاف
انه افتهم افتهم نيتك لا حشاك انته
چنت بچفوفي تطعن ظهري يمته تريد
بس تنوي الطعن تلگاهه طاعنته
يل ميتم الضوة دگ ليلك اعلة الباب
وانه بزحمة ظلام الليل مو وكته
انه بعازة ضوة بس ما ارد خطار
بطرگ شمعة بهوة و الليل ضيفته
سلمتك گلب فوگ الجرح عطاب
ومو مجروح باخر نفس رجعته
ويظني الشاف صمتي و بسمتي مرتاح
وآنه بداخلي عريس شيعته
مو كل السكت تگضي السوالف بيه
مرات البشر فوضة حچي بصمته
اليتنفس ولف و يخون بي تلگاه
چنه بلا وطن و الغربة خانگته
والمفارگ وطن لمن يجيه الليل
يحس چن النجوم عيون خازرته
ما ادري اذا سإلوك عني تگول
لأن تستحي تگول فراگ موته
چا ما حسبت للعنك يسإلون
شگلهم و آنه ما ظل عذر ما گلته
وفشلتي وداعتك من تسأل الشمات
فشلة شيخ ضاعت منة سالفته
بيك الظن گبل مابيه گطرة وداع
هسه بلا ضوة و بخوف غرگته
احس بية طفل كلما يهزني الليل
يفز بمگبرة چنهه امة عايفته
ذمة برگبت العلمك بية تخون
عساه بحالتي و بحظة و ابخته