محتاجلك يل تدري بية شكثر
و اني ادري زعلك عبر حد العذر
صبيتلك من عيني ناس ودمع
حتى انت وحدك بالنظر تستقر
كل القصايد قصدي چانن الك
من مستهلهن حتى اخر شطر
ولا ما گطعناهه المودة بزعل
من تحتدم ساعات ما تستمر
بيني ومحبتك طير ضامي ونهر
خط امنياته اشما بعد ينكسر
تزعل واگول اعتاب زعلك علي
تچفيني گطرة وأعتذرلك عطر
وتشمرني أگولن هاي شمرة ورد
عالروس مرات الورد ينشمر
بثنينهن حبيت شخصك ترة
نصين لو گلبي الترف ينشطر
ابقى انتظر منك خبر بالحلم
و الليل وحشة موت للينتظر
تستغرب الرية الهوة بغيبتك
چايمته نسمة تمر عليك وتمر
كاسرني كسر الجنح بعدك علي
و كسر الخواطر بالوصل ينجبر
ولله العمر لو طال بعدك علي
صدگني اخلصنه انتظار العمر
صدر وعجز دمعات عين الصلح
و ادريك رب الكرم لليعتذر
التم قصيدة اباب زعلك علي
و ادريك ذواق وتقدر الشعر
ولله ابتسامة گبال عيني بحلم
آنه اشتريهه شما يكون السعر
ظلمة وعداك ابالي كل اليمر
مابي ضوة وطاريك طلعت بدر
بطاريك گوة بصدري ثابت ترة
وشلون گلبي بشوفتك يستقر
بچفوفي كاتبلك رسايل عشگ
يچون لأن دمعات عيني الحبر
اي عالسوالف بيك هامت خلگ
حگه اليجيني بشوفتك يفتخر