يمته تعود
مو شابن هدومي السود
انه الخاطرك شايل خلگ بغداد
التبدل هواهه بريحة البارود
يمته تعود
مر بية حلم بي موعد الملگاك
يذبحني الحلم لمن تمر بي ضيف
اشوفك بي وطن واشتاگ
وافز مشتاگ
والگه الدنيه من دخان
وانه وضوه طيوفك والشعر صحبان
يكشخة بالي
يا هيبة دموعي التفزع بطاريك
وغير الگه اليشبهك حته اگول تهون
شحوا تسعة وتلاثينك من الگاع
الا الگاك يلا املي الفراغ التاركه بفرگاك
تعال وشوفني بيا حال
يسالوفة ضوه اعلى الماي
دفه الشاطي ورجعتك بس صدى لا غير
انازع شوگ
ولحد اخر نفس ماجيت
يلي محيرني مابين الصدگ والطيف
يخيط الضوة التارس عين الولايات
وانه بحاجتك تارس عيوني دموع
واحس چنك گبالي بجيتك عالبال
ما دامك بصدري تعيش
مر بية سوالف ناي
عزة نفسي خنگت بالعيون هموم
ويظل مخنوگ لو مر كل هوه الله برية المشتاگ
ولا شوگي يمل ولا تمل افراگ
مر اغيابك الكاسر جنح ملگاك
لكن شوگك محليه
بگد ضحكات اليشمتون الك محتاج
واگلك هيبتي بلياك
نسر والسمه بعينه الهه سگف واسياج
يمته تعود
يل ماخذ ضوه الله وياك
رد وارجع ملك كونك ترد يا تاج
اذا افك زيج حسرة واهسي بفرگاك
الدخان يطلع من سبع بيبان
الك حنيت
ومتانيك
وهاي اخر محطة شوگ
نده تعبان دمعي تهزه جيت الليل
واريدنه اعلى جيتك كون دمعي يطيح
يمته تعود
يمته تعود