شَلْحُوا عَ بْوابي التّهْديدْ
ضَافِيرُو: خْناجِرْ مَسْمُومِه
افْتَكْرُوا فِيهُنْ يِطْفُوا الْعِيدْ
الزَّارِعْ خَيْرَاتُو بِهْمُومِي
يا "هْمُومي" رِشِّي مْوَاعِيد
للحُلْم الْجايِي مْنِ بْعِيدْ
وْقُومِي يا أَحْلامِي.. قُومِي
قالُولِي: شَاعِرْ مَجْنُونْ
قَلْمَكْ عَم بِينَقِّطْ عهرْ
زَتّ بْعَقْل النَّاس ظْنُونْ
بَدْلِتْ إِيمانُنْ بِالْكفرْ
يَا بْتِخْنُقْ نَبْرات الصَّوت
يَا مْنخْنقْ صَوْتَكْ بِالْمَوتْ
وْقَالُولِي: هِنْت الأَدْيَانْ
الْ نَزَّلْهَا أَلله عَ الأَرْضْ
جْبَلْتَا بْبَعْضَا كِيف مَا كَانْ
عكَّرْت مْزَاج الإِنْسَانْ
الْ حَيَّكْ عمْرُو بِالإِيمانْ
وْعَم يفرُض إِيمانُو فَرْضْ
.. غمَّضْت عْيُونُو بِالْبُغْضْ
وْقَالُولِي: سِدُّو.. وِسْكُوتْ
لْسانَكْ حَيِّه وْحَكْيَكْ سَمّْ
أَشْعارَكْ ضدّ اللاهُوتْ
وْضدّ الْخَيْر، وْضدّ السّلْمْ
وْنَاقِصْهَا المَنطِقْ والعِلْمْ
ما بْتِلْحَقْ تِخْلَقْ تَا تْمُوتْ
.. قْبِرْهَا فِيكْ بْلا تَابُوتْ
وْقالُوا.. وْقالُوا إِشْيَا كْتِيرْ
وْنَكْرُوا كلْمَاتِي كِلاَّ
كِيف بْخَلِّي النَّاس تْصِيرْ
يا عَلِي.. تْدُوب بْأَلله
بْشَخْصِيَّاتُو الدِّينِيِّه
الْ زّارِتْ هَ الإِنْسانِيِّه
وْطَبْعِت بِالْقَلْب مْشاويرْ
تا تْبَشِّرْنا بْعرس كْبيرْ
بِالْجَنِّه الإِلهِيِّه