سْأَلْتِ كْتِيرْ.. وْبَدِّي إِسْأَلْ
يا عَلِي بْمَعْرِفْتَكْ قلّلي
كِيفْ الْمَوْجاتِ بْتِتْحَوَّلْ
غَيْماتْ.. مْنِ دْمُوعَا نْمَلِّي؟
وْكِيفْ الْبَحْرِ بْيِرْخِي مَدُّو
عَ الشَّطّ.. شْرَاشِفْ مكْوِيِّه
بْيِرْجَعْ جَزْرُو بْيَاخُدْ حَدّو
وْبِينِخّ يْجَمِّعْلُو هِيِّي؟
وْكِيفْ اليَومِ بْيِدْبَحْ خَيُّو
وْمِنْ جرْحُو بِيطلّ صْبَاحُو
وْكِيفْ النّجْماتِ بْيِتْفَيُّوا
بْخَيْمِه كْبِيرِه.. صْحَابَا رَاحُوا؟
وِالشَّمْس، الْ ما انْطَفْيِتْ مَرَّه
مِنْ وَيْنِ بْتَاخُدْ مُونِتْهَا ؟
طَلِّتْ.. شِعْلِتْ.. ضَوِّتْ بَرَّا
غَابِتْ.. ما انْسَمْعِتْ أَنِّتْهَا
وْكِيفْ التَّلِّه الْ تِمَّا واسِعْ
مِنْ تِمَّا بْتِنْفُخْ بُرْكانْ
بْيقْدُفْ نِيرَانُو بالطَّالِعْ
وِبْيِرْجَعْ يِخْفِي النِّيرانْ؟
وْكِيفْ الطَّيْرِ انْ رَفُّوا جْنَاحُو
بْيِعْلا.. وِبْتِعْلا تْرَاتِيلُو
انْ عَشْعَشْ.. بيضَلُّو عَ سْلاحُو
ما فينا مْنِ العشّ نْشِيلُو؟
وْكِيف الرِّيحِ بْتِجْدُلْ حَالا
وْبِتْزَنِّرْ خَصْرِ الْمَعْمُورَه
انْ فِرْحِتْ: بِتْرَيِّحْلا بَالا
انْ زِعْلِتْ: يا وَيْلا مْنِ شْرورَا؟
مَهْما تْقِدَّمْنا رَحْ نبقَى
تْلاميذْ.. وْإنْتَ تْعَلِّمْنا
كِيفْ، وْلَيْش، بْيِخْلَقْ وَرْقَه
أَللَّه.. تا يْخَرْطِشْ عَالَمْنا؟