شُو بِعْملْ.. دَخْلَكْ يَا قَلْبِي
تِشْرِينِي ابْتَدَا
وْحَبِيبِي بَعْدُو بِالْغُرْبِه
وْعَمْ حَاكِي الصَّدَى؟!
شُو بِعْملْ؟!.. حُبِّي نِسِينِي
عَ شْطُوطْ الدِّنِي
وْعَمْ يِكْبرْ فِيِّي حَنِينِي
مِنْ سِنِه لْسِنِه
يَا قَلْبِي يَللِّي مْجَافِينِي
سْأَلْنِي شُو بِنِي؟!
هجْرَانُو.. وْلَوْعِةْ أَنِينِي
أَقْوَى مْنِ الرَّدَى
أَحْلاَمِي الْـ بَعْدَا مَزْرُوعَه
بِلْيَالِي الْبِكِي
سِقْيِت الدِّنْيِي مْنِ دْمُوعَا
تَا دَاب الْحَكِي
يَا قَلْبِي.. الشَّمْس الْـ عَمْ تُوعَى
وْتِشْبَعْ تَكْتَكِه
سَرْقِتْ مِنْ عِينَيِّي شْمُوعَا
وْضَوِّتْ هَـ الْمَدَى
والنّجْمَاتْ اللِّي عَمْ تِسْهَرْ
عَ سْطُوح السَّمَا
مَمْنُوع يْحَاكِيهَا الْقَمَرْ
حَتَّى بِالْوَمَا
لَوَّنْلاَ بْآهَاتُو صُوَرْ
وْبِالآه ارْتَمَى
يَا قَلْبِي.. لَوْ يِبْكِي الْحَجَرْ
مَا بْيِشْفقْ حَدَا
سْرِقْنِي يَا قَلْبِي مْنِ هْمُومِي
وْنَهْدَات الْعَذَابْ
سْرِقْنِي تَا إِدْفَى عَ نْجُومِي
بَرَّدْنِي الْغِيَابْ
وْإِزْرَع الضِّحْكِه بِكْرُومِي
وْإِسْبَحْ بِالضَّبَابْ
بَرْكِي يَا قَلْبِي مْنِ هْمُومِي
بِيطِلّ النَّدَى