قالوا: قلت الحرمة شر
ونكروا اللحظة ال فيها حكيت
فاطمتك بوداعا المر
بوست ترابا وبكيت
عمرك حدا: فوح الطيب
وعمرا حدك: تقوى وحب
حبيبه وحبت حبيب
تشرّف فيهن نسل الرب
الحرمة عندك: منبع خير
ومصدر للجيل الجايي
كرمتا، خليت الطير
يحكيلا أحلى حكايه
زينب بنتك أيا بيت
مقدس، ما تقدس فيها؟
حملتا النور وصفيت
تغنّجها وتربيها
حبيت الكل وحبوك
رجال ونسوان وأطفال
يا علي وصاروا يغنوك
غنيّه انزرعت بالبال
كنت العدل ال ما بينزاح
تعطي للمظلوم القوت
تا يشبع فيك ويرتاح
ويقضي بإسمك ع الطاغوت
كنت ال مش معقول يكون
الحي الباقي طول الدهر
الساكن بالقلب وبيعيون
الزهر ال عم بيوزّع زهر
يا متوّج بحروف الكلمه
ركعت ع جريك التيجان
دحرجتا دحرجت الظلمه
تا يشرق فينا الإيمان