شفتن حدك عم يتمشوا

شِفْتُنْ حَدَّكْ، عَمْ يِتْمَشُّوا

وْعِينَيْهُنْ تِضْوِي قِدّامُنْ

لا فِزْعُوا مَرَّه، وْلا انْغَشُّوا

فِرْحِتْ بِوْجُودُنْ إِيّامُنْ

بْوَهْجِ نْجُومَكْ صاروا يْوَشُّوا

لَيْلُنْ، وِتْزَهِّرْ أَحْلامُنْ

وْكِلّ ما الإعْدى كِذْبُنْ رَشُّوا

يْسِنُّوا عَ الصَّفْحاتِ قْلامُنْ

عاشوا كْبارْ، وْماتوا كْبارْ

هاماتُنْ مَلْعَبْ للشَّمسْ

بْسَفْراتُنْ لَوْ مَرّ نْهارْ

بْيِتْكَحَّلْ بِغْبارُنْ أَمْسْ

تَرْكُوا الْخَيْر غْمارِ غْمارْ

وْخَيْرُنْ بِيفيضِ مْنِ اللَّمْسْ

يا عَلي.. مَرْقوا زُوَّارْ

.. وْبِقْيُوا بِالأَقْطارِ الْخَمْسْ

خِلْقوا.. وْكانوا أَشْرَفْ خَلْقْ

سيرِتْهُنْ، عبْرَه بِكْتابْ

انْ غابِتْ شَمْسُنْ.. كانِ الْبَرْقْ

يْمَحِّي بِالشَّهْقاتِ غْيابْ

شهْدِتْلُنْ مَوْجاتِ الزُّرْقْ

وِتْبارَكْ بِالدَّعْسِه تْرابْ

وْلَوْ ما بْنُورُنْ ضَوُّوا الشَّرْقْ

ما انْفَتْحِتْ للشَّرْقِ بْوابْ

إِسْمُنْ سِرّ، حْفَظْتُو مْنِيحْ

حْفَرْتُو عَ شْفافي آيِه

بِتْبُوسُو هَبَّاتِ الرِّيحْ

وْبِتْقِللّي: حْكيلي حْكايِه

بِحْكي حْكايِتْهُنْ.. بِتْصيحْ

بْتِبْكي.. وِبْشُوفا جايي

بِهْبُوبَا غمرِ تْسابيحْ

للكانوا هِنِّي الْغايِه