تا أوصفك يا جرح قلبي صرت

تَا أُوصْفَكْ يَا جرح قَلْبِي صِرْتْ

رَجِّعْ لَيَالِيهَا

يَللِّي سْهِرتْ فِيهَا

وْقِدَّامْ عِينَيْهَا الْخَجُولِه كْبِرْتْ

شِفْتَكْ قَنَايِةْ دَمّْ

أَوْجَاعْ عَمْ بِتْلِمّْ

بْتِحْبَل كَأَنَّكْ أُمّْ

مَلْيُون "آخ" بْبَطنها سِفَّرْتْ!

تَا أُوصْفَكْ.. وِقَّعتْ تِطْلِيعِي

عَ جْوَانْبَك أَيَّامْ

وِحْرمتْ عَيْنِي تْنَامْ

قِلْتِلها: بْجرْحِي أَنَا ضِيعِي

وْصَارُوا عْيُونِي يِسْبَحُوا

بْخلْجَانَكْ الْـ عَمْ يِنْزَحُوا

عَ شْطُوطْ مَا بْتَعْرِفْ صَحُو

وْرَمْلاتْهَا بْتِفْرَحْ بِتِرْكِيعِي

يَا جرحْ قَلْبِي.. كْتِيرْ بِتْرَجَّاكْ

لا تِدْلق شْفَافَكْ

بَرْكِي حَدَا شَافَكْ

وْخَافْ مِنَّكْ قبل ما نَجَّاكْ

مِنْ وَيْن بَدِّي جِيبْ

إِنْسَانْ مِنُّو تْطِيبْ

بِخْيَالْ إِيدُو تْغِيبْ

وْيِغْرَقْ بِإِسْمَكْ كِل ما هَجَّاكْ؟!