خَايِفْ مِنِّكْ.. مِنْ نَهْدَاتِكْ
مِنْ تِطْلِيعَه بْتِدْبَحْ دَبْحْ
مِنْ شَمْس بْتِرْسُمْ ضِحْكَاتِكْ
وِبْتِتْرُكْ عَ شْفَافِكْ جُرحْ
وْكِيفْ بَدِّي جَرِّبْ لاَقِيكِي
كِيفْ بَدِّي إِتْطَلَّعْ فِيكِي
بْلَمْلِمْ صَوْتِي تَا حَاكِيكِي
وْصَوْتِي مْنِ الْخَوْف بْيِنْبَحّ
كل ما بْعِدْتِي وْغِبْتِي أَكْتَرْ
حُبِّي بْيِتْجَدَّدْ وِبْيِكْبَرْ
وِالنَّطْرَه بْتِمْشِي عَ سْكُوتِي
إِيدَيْن تْعَمِّرْلِي بْيُوتِي
وْمَوْقِدْ عَ سَهْرِتْنَا.. يِسْهَرْ
لَوْ بِقْدِرْ طَفِّي بْإِيدَيِّي
نَار الشَّهْوِه اللِّي بْعِينَيِّي
بْتِحْرِقْنِي الشَّهْوِه الْمَجْنُونِه
وْبِتْلَوِّنْ صَفْحَاتْ عْيُونِي
بِالدَّم الْـ عَمْ يِغْلِي فِيِّي
خَايِفْ قِلِّكْ إِنِّي بْحِبِّكْ
وْتِتْكِي قْبَالِي وْيُوقَفْ قَلْبِكْ
إِفْرِشْلِكْ صدْرِي وْغَطِّيكِي
وِبْبَوْسِه زْغِيرِه إِحْيِيكِي
وْتِفْرَح فِيِّي نْهَايِةْ دَرْبِكْ