يقول الكثيري يا علي صابني الهوجاس
تردت حياتي يا علي وزاد هوجاسي
سبايب وليفٍ يا علي مد لي بالكاس
شربته ولا ادري وش وضع في وسط كاسي
يخليني اهذري لوحدي بلا جلاس
ومرات أجيب اسمه واهذري لجلاسي
اسرني وخلاني أسير بلا حباس
وضعني بغرفه وحكم القفل حباسي
حكمني وحكمه لي يشابه حكم جساس
وأنا ماهقيته يحكم بحكم جساسي
جرحني وعذبني وشفت الشقا يا ناس
يخليني اسولف بدربي وأنا ناسي
عديم الضمير اللي كواني بدون إحساس
كوى خافقي خلاني أضيّع إحساسي
يطاوع كلام العاذل الحاسد البلّاس
وأنا فيه ما طاوعت حاسد وبلّاسي
الى من تغيّب احسبه من ورى تكساس
أقوم أطلب العنوان واسمه بتكساسي
بعد فرقته شيبي تغطى الهدب والراس
وأنا ما حسبت الشيب يطغى على راسي
سهرت الليالي والسهر جاب لي وسواس
الى من ذكرته يا عرب زاد وسواسي
هموم الزمن كانت من أول على المقياس
وذا الحين فاقت كل حدٍ ومقياسي
ولو شافه الملياردير اعلن الإفلاس
وأنا يوم شفته يا علي اعلنت الافلاسي
الى طابلي بين الملا يا علي المجلاس
تذكرت زوله وعفت يا خوك مجلاسي
سألته عن ربوعه وقال القبايل ياس
بعد ما شرحلي زاد همي مع ياسي
غزالٍ صغير السن يكفيه لبس الماس
الى من لبسها غار من زينه الماسي