الوقت ما هو بصافي ماهو بدايم عوافي ماهو على ما تريد
نوبن تزين وتشيني هذي سوات السنيني ما فيه شين جديد
ناسن بها يفرحوني وناسن بها يحزنوني وهذ الاكلام الأكيد
احد بوظيفة توفق وثاني قام يتصفق يقول ما حظي سعيد
واحد زميله تخرج وثاني جالس يتفرج ويقول عسى ما تعيد
وهذ مبسوطن يغني وهذا مريضن يوني فيه الألم ما يهيد
وذا للفرح متجهز يببي على طول ينجز فرحان كنه بعيد
وهذا حزين ايتفا عنده قريبين توفى قامت أحزانه تزيد
وهذ طلع يتمشى وهذا سجينن مغشى يمشي برجله حديد
وهذا فلوسه كثيره مستانسن في مسيره ويجيب اللي يريد
اليا بغى شي جابه رصيده زايد حسابه يركب ويلبس جديد
واحد يشوف ويناظر من الفقر والجوع حاير ما عنده شين مفيد
عنده أطفالن جياعي وضاقت عليه المساعي والبيت طين وجريد
وهذاك امن بداره جالس وممن مساره مبسوط بعيشن رغيد
يمشي ولا هو بخايف مبسوط والجو كايف يسافر ويجي ويعيد
وحدن من ارضه مشرد عدوه له يتوعد خايف من كثر الوعيد
لاجي وساكن بخيمه والخوف والبرد يضيمه مطر وبرد وجليد
يمشي على الرجل محفي وما فيه شين يدفي عن المطر والصريد
هذي ظروف الحياتي وصفتها بالصفاتي على الشقي والسعيد
وترى السعادة تراها ماهي بمالن وجاها بطاعة رب العبيد
العبد يخطي ويذنب وما فيه شين ما يكتب وعملك يبقى شهيد
وبالعمر ما حد مواصل والموت للعبد حاصل اقرب من حبل الوريد
ويالله يا ربي تامنا وانك تزين عملنا اليا صرت لحالي وحيد
انك تغفر ذنوبي وانك عليّه تتوبي وتغفر لي يوم الوعيد
يا كثر والله خطايه لكن بالله رجايه هو الكريم المجيد
يغفر ذنوبن كثيره ويجير من يستجيره يعطي ما ينقص يزيد