نصيحتن مني لنفسي والإخوان
بلاش ما تشرى بدفع الدنانير
تكفى لا ترقد ظالم فلان وفلان
الظلم ما تجي عاقبته على خير
والظلم ينقص ما يزود بالإحسان
وفعل الكباير جنبه وافعل الخير
واحذر من الدعوة قبل فوت الأوان
دعوة من المظلوم تدمرك تدمير
مثل السهم ترميك رميه لنيشان
وتبقى بها طول العمر بالمخاسير
وحذراك في دنياك لا تجرح إنسان
ترى الكلام الشين مثل المسامير
وشوك القلوب الهرج من دون عنوان
ثمّن كلامك ويزنه قبل لا يصير
واحفظ لسانك بالمجالس على شان
كرامتك تحفظ ولا تجرح الغير
لسانك حصانك وللهرج ميزان
وحاول تنقى الهرج وزين التعابير
الهرجة الزينة لها منزل وشان
عند الرجال الي تعرف المقادير
وترى احترام الناس من ضمن الأديان
ويجلب محبه دون جهد وتفاكير
والهرج لا جنبك خله ولو كان
فيه الخطا والصح، والصح بيصير
واحذر تنبش شي خفّته الأزمان
ولا تكشف المستور من دون تبرير
تقوم تنبش بالخفايا تقل جان
كنك تسوي بالمجالس تقارير
الخير مامن خير وبالشر عجلان
تفرح اليامنك كشفت المساتير
لا تحسبنك بكشف الأسرار كسبان
يالي على الغفلات تويق وتغير
وتبحث عن أشياء أنت مالك بها شان
وتجيبلك هرجن بليا مصادير
مانته عمى عيون البصر عميان
أشغلت نفسك في صدور ومحادير
جنب طريق الناس لا تصير فتان
تراك تدفع كل حساب الفواتير
صل وتعبد واطلب الرب غفران
يا قاك ربك عن لهيب السواعير