من صد عنا في مزاجه بكيفه
يروح وحنا مانتعرض مطاياه
ومن باعني مشريه لو بتعريفه
ومن باعنا بأرخص ثمن ماشريناه
النفس ماهي للخلايق ضعيفه
مانتبع المقفي ولا ندور رضاه
نفسي عزيزة لو اسلوبي لطيفه
ومن صد لو انه عزيزن تركناه
ليا صار مانخطي بكتب الصحيفه
الشخص لامنه تغير بلياه
حنا كرمتنا علينا كليفه
والرأس ما نوطيه مغير لله
صحيح أحب أهل النفوس الخفيفه
وأخص بها الي ماتغيره دنياه
ماتغيره الأيام لو هي كسيفه
يضحك حجاجه قبل يضحك محيّاه
واهل الكبر واهل الهروج المزيفه
اللي يتقلب كل يومن على جاه
اللي اخلاقه مثل طبع العسيفه
نوبن يزين ونوب ياشين ملقاه
و نجنّب اللي يشعل النار ليفه
هرجه كثير والصدق جنب وخلاه
و الشجرة اللي مايله مستهيفه
لا ظل فيها ولا ذرانن تذرّاه
مالي بهم حاجه ولا لي وظيفه
والله يغنينا في جزايل عطياه