شين طبيعي لي ناسن يسبون
ماني على كل المخاليق غالي
ناسن علي يثنون وناسن يذمون
وهذي حياة الناس في كل حالي
ناسن يحبوني و ناسن يبغضون
واليا صرت انا معجبك دور بدالي
انا بشر ماني منزه ومصيون
عن الخطأ وعن الغلط والمقالي
لكن نحاول نمشي بدرب مأمون
والله يوفقنا طريق العدالي
واما الخطأ موجود مهما يقولون
ولا فيه شخصن يدعي بالكمالي
والله خلق بالناس صاحي ومجنون
العقل وتفكير فيه إعتلالي
لو يسمعون الهرج سرعه يحكمون
عليك لو إنك من الذنب خالي
وبعض العرب عن الخطا يتغاضون
ويفوتون اكثار ماهي إقلالي
وبعض العرب عند الخطأ لك يقيفون
ويحسبون دقاقه والجلالي
واليا حصل منهم خطأ لك يبلشون
يبون تتركهم بليا سؤالي
واليا حصل منك الخطأ لك يلومون
وتكثر عذاريبك من اول وتالي
معروفك الماضي نسي وصار مدفون
كنه عليه هبت هبوب الشمالي
وبعض العرب علقم ومرّن بلا لون
وبعض العرب مثل القراح الزلالي
لو كان كل الناس من الله يخافون
ماشفت ماشفته بحالك وحالي
ولا شفت بين الناس فاتن ومفتون
الكل يبقى داله القلب سالي
ولو كان كلن يعطي الحق موزون
الحق يعطى دون هرج وجدالي
كان المشاكل تنتهي دون في دون
لكن هذي الناس يابن الحلالي
صعبن ترضّيهم ولا هم بيضرون
والله لو قدمت ما كان غالي