يا قلب تكفى من تجاهلك خله
لا تتبع المقفين لوكان غالين
اليا صار ما منك خطا حاصلن له
لا تشغل نفسك فيه أول وهاالحين
ولا تعاتبه في كل غلطه وزله
صد وتغاضى وبدل العسر باللين
ولا تمسح اسمه من دفاتر سجله
يمكن يروح اليوم ويعود بعدين
وان اقبل اقبل له ورحب وهله
ودمح خطاه واعتبر ما حصل شين
لا تذكره بما فات وحذر تقله
الماضي انسه وبدل الشين بالزين
وان كان ما عوّد بلياه كله
خله يروح وصك كل العناوين
وكان انت مخطي ايصله واعتذر له
العذر ماهو عيب من ناس مخطين
وإن كان ما منك خطا ومنك زله
خله يروح وفيه غيره كثيرين