اليا مات ابوك تعيش كل المصاعيب
تبدا حياتك في حياتن جديده
كنك بساحة حرب من دون تدريب
والماضي الي راح تجلس تعيده
تفتح عليك ابواب من ساعة يغيب
كن الظروف ساعة غيابه وليده
من عقب ماهي مقفله بالدواليب
عقب فراق ابوك صارت عديده
اما تضيع وولا السنع لدربه تصيب
ولاغديت لاهل الشماميت صيده
اليا مات ابوك تعيش كل التجاريب
شين تريده وشي مانته تريده
ان كنت اكبر واحد تشيل وتجيب
حملك تشيله وفوق حملك تزيده
وان كنت الوسط شلت حمل المناديب
حمل الكبير وحمل الاصغر تجيده
وان كنت الاصغر في ضميرك لواهيب
تسكت لو بخاطرك شين تريده
تمسّك الحاجه ومنك يفضي الجيب
مثل الجمل الي شكى قصر قيده
من اول ماتنقصك كل المطاليب
لو ينقص ماينقصك حاجه مفيده
عقب الابو تشين كل المشاريب
كن الطعم به الصنق من حديده
وتحس في ضيقه وخنقه وترهيب
وتحس في برد وحراره شديده
ذرا الأبو يذريك عن الهباهيب
وظله يظلل الولد مع حفيده
هذا كلام الي مضت له تجاريب
في واقع الايام اقرا الجريدة
تشوف وتلقى بالسطور الاعاجيب
وتقلب الايام ماهي جديده
ذقنا بها حالي ومرن ولايطيب
ونصبر على مر الزمان وحصيده
ياالله يلي تعلم السر والغيب
يلي جميع الحل وربط بيده
تغفر لمن كانوا ضيوف ومعازيب
غابوا بسفره السفر ماتعيده
طول سفرهم وللخبر ماحد يجيب
ولافيه عوده من سفرهم جديده
اخفتهم الايام ودنيا التعاجيب
سود الليالي والأيام المكيدة