الحب بلوى من تقادير الأقدار
يخلي القلوب القوية ضعيفة
كنه بوسط القلب مدقوق مسمار
من قوته بالقلب تسمع رجيفه
خصن اليامن اللقى بينهم صار
ثم افترق عقب اللقى مع وليفه
يجلس بهم وحزن وتزيد الامرار
كنه من العلقم أكله رغيفه
لكن عسى قلبك من الهم ينجار
وعسى المزون اللي غشتكم خفيفة
عسى مطرها عنك يكنه الغار
ويطيب قلبك من الجروح الكسيفة
وتبقى حرير القلب من كل ما صار
وينفك ربط القلب من الكتيفه
وتبقى كما طيرن عن الأرض لا طار
مغير للجنحان تسمع رفيفه
وابدأ حياتك واعتبر شي ما صار
وارحل عن شويحط وكب الرديفة
والماضي انسه وبدل الفكر بفكار
وحاول تسلي النفس باي وظيفة
وظف فكر النفس في عزم وصرار
وحاول تخطى من الأمور الكليفه
ولا تتبع المقفين لو صار ما صار
لو كان أعز الناس خله بكيفه