يا بن آدم مهما كنت أنت أو من تكون

يا بن آدم مهما كنت أنت أو من تكون

الكلام ذا لي ولك ابكتبه

شل من قلبك الحقد والأمر يهون

كل شين يهون وكل شين تكسبه

بس خل عنك الحسد وترك عنك الظنون

ولا تحلل كلام الناس في ما ترغبه

ولا تصير مثل الي ياكل بليا سنون

يحسب الأكل ني ماهو معجبه

ولا تقول أمطرت لا شفت المزون

يمكن الله المطر ما يجلبه

ولا تعجل بهرجك وحكمك تكون

عرضتن للهرج واللي يقضبه

خل عندك ركاده وخل وضعك سكون

واصبر ماهو كل شيء أتحسبه

فيه هرجن يجيلك اعتبر من يقوله يمون

خل السارحة تسرح لعل أتكسبه

دام وجهك سليم ولاجت بالعيون

خله يولي وفيه غيرك ينشبه

والحياه دروس ودنيا فتون

والهبوب مشرّقه ومغرّبه

لا تميل بك الهبايب مثل ميل الغصون

كل غصنن يميل الهبايب تسحبه

والحمل ينشال من فوق المتون

والجمل ما كل حمل يتعبه

بس فيه حمول باليا وزون

وكل حملن باليا وزن لا تقربه

مانته بمجبورن على شيل الطنون

وماهو كل ما شفت شي تجربه

ولا تسمّع لكل من غنى على زين الحون

ولا تصدق كل من قال الأقارب عقربه

الأقارب بالمواقف ياقفون

لا تجاهلهم وتسمع أهل الطبطبة

والرجل من دون ربعه ماهو لون

يحتمونه كل ماجت صعبة

والخطا موجود وانتم تعرفون

وكل نبته بالأرض تعلقه تربه

سدد وقارب وشف اللي يهون

لا توقف كل ما شفت عتبه

امش وضع البساطة ولا تخل الكاف نون

وكل شين هوّنه لا تصعبه

ولا تهجر الوصل وتعيش محزون

والرحم ايصله ومن تبعد قرّبه

والتسامح والتغاضي له فنون

ترضي الزعلان والأجر تكسبه