لا تعجّب بالدنيا وأنت رَجلن فهيم
الليالي تعلّم وأنت تلميذها
الليالي تعلم وافتهم واستقيم
لاتزل القدم بك وأنت تمشي بها
والطريق المشوّك والحجر والعثيم
جنبه وامش مع جادة أنت تدري بها
السهل مايضرك والمسالم سليم
والوعر والحجر رجليك يدمي بها
وكل رَجلن فيهم يصير لنفسه خصيم
ولا تخلي على نفسك شيّن يذّي بها
وكان عندك حقوق لاتخلي الدعوة تقيم
قبل وقت الطلايب سلّم حقوقها
اعرف انك على الدنيا ما انته مقيم
يمكن الصبح تصبح بس ماتمسي بها
فيه ناسن رحيل وفيه ناسن تقيم
وفيه ناسٍ ماتدري ويش ياتي لها
غيب الأيام خافي عند ربن عليم
عالمن كل ما يخفى على غيبها
وانتبه لا تسمّع ثم تطيع الحريم
غالب الشور منهن قاصرن دونها
فرقن القبايل من زمانن قديم
والحرايب سببهن زايدن كونها
خل عندك تميز وخل رايك حكيم
وادرس الهرجة اللي قبل لا تقولها
وابن عمك احذر لا تحطّه خصيم
سامحه وادمح الزلة على لونها
والخوي اخدمه واصبر وخلك حليم
ولو تشوف القصور منه لا يدري بها
وانتبه جارك اللي عندك له لا تظيم
ولا تضيع حقوق جيرانك وتغيظها
حق جارك كبير وله وصايا قديم
من نبيك حقوق الجار وُصّي بها
و والدينك لهم حقن بعنقك عظيم
وحق أمك وأبوك بذمتك دينها
خل بالك وسيع وخل قلبك رحيم
وكل صعبة عليهم حاول تشيلها
ساهرينن على راحتك وأنت طفلن فطيم
وصابرينن على زين الليالي وشينها
لا تجازي سهرهم بالأسى والحطيم
يوم شابوا وعجزوا وأنت تاسي لها
ولا تلهّى بشغلك والمؤذن يقيم
لازم انك تجيب والفروض تاتي لها
والرحم ايصله وخلك مستديم
وكل هرجة تجيك لا تركب خيلها
ولو تجيلك هرجتن من انسانن سقيم
دفها دفها لين تخلف سيرها
ولا تكثر عتابك ولا تخاوي اللئيم
وعز نفسك تجدها عند ماعزيتها
والقناعة كنز وافهم يافهيم
والصبر والمروه تحمد عواقيبها