عديت رجمن جنوب رواف من قبله
حزم الجمل يوم جيته هيض اشجاني
وانا جروحي بقلبي زايده قبله
وانشهد انه ذكرني وبكاني
نقّض جروحن بقلبي قبل مندمله
واصبر واجامل ولكن كان ماكاني
ذكّر على القلب ذكرى ماهي بسهله
ذكرى تهز الضلوع من كل الاركاني
ذكرى بها المواصل منقطع حبله
الياس قبل الرجاء مكتوب عنواني
الوصل مقفي وقفّى سايقن زمله
في ليل ظلما وعج بوسط ودياني
ثم اقتفاه السحاب الي هذا ثقله
من قو سيله كل وادي يسبق الثاني
من قو سيله وسرعه شال ماقبله
والطلح شاله وكسّر كل الاغصاني
لكن على الوقت نصبر نهاية الجملة
والعبد ماله عن تصريف الازماني
والناس تصبر و كلن شايلن حمله
و اللي عليّه على غيري تعداني
وهذي سوات الزمان ولاتعجب له
نوبن به افراح ونوبن تاتي احزاني
لكن تغاضى واصبر وجدد العمله
الصبر مذكور عاقبته بالاحساني