في بحور الكون

في بحور الكون

عُمت.. وعديت

... وقصور في خيالي

بكيفي بنيت

وان قصّر قصر عن المطلوب

... في ثواني

القاني أوام هديت

واللقمة الحاف

بكرامة.. غويت

... والشهد ان جه بالذل..

أبيت.. أعرف طعمه

.. بس بكيفي

... اشرب.

لو يطلع شربة زيت

وما حدش يوم

علمني العوم

.. ولا عمر الموج

هز شراعي

ولا عمر زحاف

خلاني أخاف

.. ولا علة ف يوم

لوَت دراعي

طب اخاف من ايه؟؟!!

وهخاف على ايه؟؟!!

دا الرزق ان تاه

حتمًا هلاقيه

والعمر كتاب.

وهبه الوهّاب.

ولا حرف هتقدر تلعب فيه

هوّنها.. تهون

وكفاية جنون

واعقل

ما تكونش ف يوم فرعون

وهامان يغويك

ويغمي عنيك

ويخليك مسخة لكل الكون