هات صابعك.. وابصم ويانا
دي عريضة شكر لمولانا
هات صابعك
واقفل بقى صفحة أوجاعك
لا تصحي مواجعي
دنا حتى بصمت ومن قبلك
بالعشرة
وشوف حتى صوابعي
ما تقولشي بتقرا أو بتكتب
لساعتها يقولوا عليك رجعي
ومتعنطز.. نافش جناحاته
ومغطي الحيطة بشهاداته
مولانا السلطان طال عمره
مش عاوز حد ف ولاياته
يتجرأ أو يعصى أوامره
هات صابعك هات
واديها سكات
هات صابعك.. وابصم ويانا
دي عريضة شكر لمولانا
علشان مولانا ما هو اتكرم
وفتح لك مدرسة تتعلم
عاوز تخربها وتتكلم
وتعارض.. مش عاوز تبصم
هات صابعك واياك تتنفس
هات صابعك هات
لو فاهم.. اعمل ما فاهمشي
لو شايف
غمض ما تشوفشي
الضلمة تخللي اللي مفتح
يحسب خطواته.. ويحسس
هات صابعك هات
من غيرك او بيك راح تمشي
وهتطلع انت اللي مخللي
إبليس الملعون يتأبلس
هات صابعك هات
واديها سكات
هات صابعك.. وابصم ويانا
دي عريضة شكر لمولانا
مبروك يا جنابك
أحبابك
بصماتهم.. شاهدة..
.. وبسكاتهم.. شاركوا الحدوتة..
وأصواتهم دفنوها ف بير جوة صدورهم
بيباركوا لبعض بدستورهم
مناخيرهم
مرفوعة تشمشم في شرابك
دا شرابك ريحته تغذينا
وجنابك نفديك بعنينا
ويا ريت لو تتجلى علينا
بعلاوة تبشبش ليالينا
دا البرد مكسر صوابعنا
وواقعنا منشف مدامعنا
وادي شعبك كله بصم معنا
وبصبعك لو يعني تشاور
وبنص الدستور.. هتخللي..
النيل يتحول شربات
ونعيش في نبات
صبيان وبنات
وهنبصم تاني لو احتجتم.. أيها بصمات
هات صابعك هات
واديها سُكات
هات صابعك.. وابصم ويانا
دي عريضة شكر لمولانا