أنا راضي بقضاء الله

أنا راضي بقضاء الله

ماليش غيره معين.. ولا جاه

ولما الحظ بيلطش.. وبيعاكس.. أقول فورا.. يا حول الله

وطول عمري.. ومن صغري.. وعهد الله..

بحب الوحدة والقعدة مع نفسي..

واكلمني.. واحاسبني..

واجاوب.. وانحرج.. واضحك واقوللي.. يااااااه!!

واحب الصحبة ع الغالي بدون مطمع.. ولا محاباة

كبرت.. ودنيتي كبرت.. وشوفت وشوش ما تتعدش

عدد شعري اللي ضاع مني.. وصلعني

عدد خطوي اللي تاه في الزحمة والمعاناة

عرفت الحرف.. حبيته..

وعشت كتييييير مع الشعرا..

ليالي صعلكة.. فقرا..

ما فيش في الجيب يجيب يعني.. بصيص فرحة

ولا هدمة ترد االبرد في ليلة دفاها تاه

وكنا اصحاب.. بفينا احباب..

على سكة أمل ضايع لبكرة جميل بنتمناه

على سميطة.. وشاي ميزة.. وقصيدة حلوة نسمعها

نعيش في فرَحها ووجعها..

ونحضن بعض.. والفرحة.. تخلينا نقول الله

.. وتاهت خطوتي مني..

كبرت وحيد.. وفار سني..

وفاجأة لقيتني يا ولداه..

بقيت واحد من الآباء.. وبتمنى أطول الفول

مدرس.. مهنتي كلمة أصلّحها..

في عالم بايعة أرواحها لمصالحها

ولا تفرقش وياهم.. تكون فاعل..

.. تكون مفعول

وضعت في سكة اللقمة..

وحرفي هو عكازي في ليل عاجز.. وأسعار غول

ناداني الرزق من سكة بعيييييييدة... هناااااااك..

سافرت وحرفي كان صاحبي..

وكان بيتي.. وكان شباك..

يعرفني على العالم..

.. وانا في الغربة متكتف بكام واجب..

.. وكام مرفوض.. وكام مقبول

وخانق كل أحلامي..

وكاتم كل أوجاعي.. وليل الغربة بيا يطول

وأرسم بكرة.. واتمناه..

واقول: بكرة اللي ما شوفتوش

.. مسير ابني في يوم يلقاه

ولما رجعت لبلادي..

لقيت الضلمة بلعاها.. محاوطاها

صرخت بعلو ما في الصوت

ما فيش حيلتي سوى صوتي

وحرفي اللي ما يرضى سكوت

كفاية مووووت

كفاية موووووووت

سكوت الناس على الظالم

وخوف الناس من الجبروت

ورزق الناس بياكله الحوت

دا أوحش مووووت..

دا أوحش موووووووت

.. لقيتك جنبي يا صاحبي

بتسمعنى

وحاسس باللي واجعني..

وحرفك زي حرفي تمام.. يشجعني..

بنفس اللحن.. نفس الصوت

بترفض عيشة الهلفوت

يا اما نعيش.. وعيشة صح.. صح الصح

يا إمّا نموووت

ناديتك.. قلت لك: حمدي.. أنا عودة

ملامحك مش غريبة يا واد

شايفها بالأمل بتعود

مش انت اللي حلمت معايا بالأفراح؟

مش انت اللي رسمت لبكرة ألف صباح؟

مش انت ابن البلد عاشق ضفايرها.. وعنيها السود؟

أنا عارفك.. ومش ناسيك..

وحلمي لسه بيغني أهو في إديك

تعالى نكمل الغنوة..

تعالى نخللي شمس الحرف تولد بكرة بالقوة

فقلت: ان انت مش هو..

دنااااا غلبان..

وطول عمري على الهامش

وبرة الحلم..

.. ونسيته بقالي زماااان

ضعيف.. مستني حد يشدني جوة

فشديتك.. لحلمي اللي هيكمل بيك

ومن يومها..

وانا بلقاني في حرفك..

.. وحلمي بلمحه في عنيك

وبفرح وانت بتغني.. على لحني..

وباسمع ليك

وراضي أكيد بحكم الله

ماليش غيره معين.. ولا جاه

عرفت انا ليه بحبك ياااااه؟

عشان شايف معاك بكرة اللي بتمناه