فطرت لك قلب ودك تعرف اشفافه
تستسقي اسرار تنتج لك عن شفافي
يا صابر الصمت لو كبد القهر لافه
لف المواقيف لا يشمت بك الافي
لو خفف الضيق من شرياني اوصافه
دواته الدم لو تنفعني اوصافي
مير البلا طب ضيق المشتقي طافه
ما تشرق الشمس واسراج الفرح طافي
تبت يد الهم تب وتب من حافه
تهت بتواليه تيهة من مشا حافي
وصل السهر هم يشكي منه ميلافه
حبل المواصيل مسه شوق ميلافي
ليلي لو اغفاه لحظه ينضر خلافه
بعيون الاشواق دايم ينظر خلافي
لا قلت له ليش قلبي ترفض انصافه
يجفل على الصبح فيني يرفض انصافي
عذره لياليه من فرقاه خوافه
تطرب ثوانيه للي يشكي الخافي
مرات اقول انت ياليل العنا سافه
اقدح صوانيك وألبس فروة السافي
مقرود اناجيك كني كاهن اعرافه
يكفر بي الهم وادرك ضيعة اعرافي
اقفي عن الضيق لكن داخل غلافه
يطويني القيد وابقى داخل غلافي
من يفرش القاع يلقى ليله لحافه
لا اقبل له البرد يفتح حضنه الدافي
من ضمة بحيل قامت ترجف اطرافه
وانا احضن البرد لين افقد به اطرافي