ياغلا سلطان جيتك والمشاعر حيه
أشتري خاطرك واشرب ضحكتك وأفداها
من يلوم إلى تعلق في هوى حوريه
يوم يسري من زعلها لين حد رضاها
جادلٍ هزت عروش الجمله الفعليه
لين صارت كل عذرا تلتفت لخطاها
لا تلوموني ونفسي بالهوى مبليه
من تعلق في هواها ماقدر يجفاها
كيف أزعلها وأنا اللي حالتي مرثيه
يوم تقفي من زعلها والتفت لمناها
علمتني في وفاها ميزة الحريه
وعلمتني في لقاها سر من يهواها
يوم تقبل كل ذكرى قبلها منسيه
تختصر كل الخلايق عند من يلقاها
للبرائه في ملامح وجهها ماريه
ميزتها عن جميع الغيد يامحلا ها
ويوم تجمعنا سوالف قهوة العصريه
كل معنى للعذوبه تنطقه من فاها
سالفتها والفتها كنها مرويه
وابجديتها تسر اللي سمع مغناها
كيف ابرضى علموني في زعل حوريه
من زعلها جيت ساري لين حد ارضاها
ياغلا سلطان جيتك والمشاعر حيه
حالف اني غير نفسك ماطلبت رضاها