أرجوك نامت عيوني لا تصحيني
يكفيني اللي من الترحال عانيته
يكفيني اللي مضالي بأول سنيني
ياوجدي اللي مع الترحال خفْيته
أرحل وأحط المدى مابينك وبيني
لعلي انسى غرامك يوم صديته
وأطول مسافات عمري فيك ترثيني
حتى المدى هلّت ادموعه وبكيته
في غربتي كل طاري منك يلفيني
شف عاشقك ياغرامي وين وديته
ساهر مع الجرح لوهو كاد ينهيني
وأتلفت عمري وحالي فيك هدّيته
تبغاني ابوح لك جرحي وتكويني!
وش لون اعلمك باللي فيك سميته
كيف انزع الصمت وأحرق لك بساتيني
وأهديك بوحي بعد ما أنته تناسيته
وش مكسبك يوم تشمت بي معاديني
وتحطم اللي على رمضاك حديته
وشلون ابكتب على الصفحه عناويني
واشكي معاناة جرحي يوم خاويته
اهديك عمري وروحي وانت تهديني
جرحٍ مع الوقت دمرني وملّيته
ماكنت اظن الهوى والعشق يرديني
لين الهوى هبْ حلمي وانشلع بيته
كنت احسب اللي تمنيته يوافيني
يحفظ مواثيق عهده يوم وافيته
ماكنت أظن الجفا طبع المحبيني
كنت احسب الغرس يثمر كل ما اسقيته
واليوم جفت سواقي مع شراييني
يوم انتهى عمري اللي فيك منيته
ياقلبي اللي حصل مابينك وبيني
لوكنت ما تدركه لابد حسيته
ماعاد لي فالمحبه شي يغريني
لويرجع اللي مضى ماقلت ياليته
تعبت انا منك واختلفت موازيني
ماعاد اميز طريقي يوم راعيته
منهو على راحتي يقدر يرسّيني
يحفظ وصاتي بقلبه يوم وصيته
مادام ما بالزمن صاحب يخاويني
خاويت ليلي وطول الصمت خاويته
خل المراره بكبدي نار تكويني
ولايظهر اللي عن العذال واريته
وانا من الجرح ميت لاتداويني
ريّح ضميرك وقلبك ليش عنيته
لو طيفك يمرني ماعاد يحييني
لو هو يعانقني بلهفه وضميته
ماتت مشاعر هوانا لا تعزّيني
وش عاد ينفعك دمعك يوم هليته
أرجوك نامت عيوني لاتصحيني
يكفيني اللي من الترحال عانيته