عدّت شهورٍ ولا عدّا هذاك الشعور
لا ألتم جرح المفارق جاه من يلطمه
ياللي نبشت الشعور اللي مضى له شهور
من بين الأضلاع غافي وش تبي تنهمه
دفنت لي حي بالأضلاع مثل القبور
ما يوحي الصوت حتى لو بغيت ازهمه
أجاهد الذكريات القاسية بالسرور
اخفي شعوري عن الشمّات لا يفهمه
ادلَه عن الذكريات اللي تجيني تمور
لو جيت ابسلا تجي بالليلة المظلمة
لا مرحبا بالخيال اللي بليّا ظهور
ما يصحب إلا طواري كلها مؤلمه
ليت المفارِق خذا له غصّةٍ بالنحور
واقفى بذكرى وشعرٍ يوم هو ملهمه
الأغنية والمطر وأنسام ريح العطور
ثلاثةٍ للمفارق دايمٍ تهزمه
الليل والبعد واللي زار ستر الصدور
تهد حيل المعنّا ماهي بترحمه