باقي على موعد لقانا دقيقه
وأنا انتظر لحظة وصوله على الوقت
وساعة لمحته بين كل الخليقة
دارت وحارت دمعتي يوم دنقت
افرك يديني بين حلم وحقيقه
وشلون يقفي بعد مانا تعلقت
الله حسيبه كيف يترك رفيقه
دامي على لاماه جيته وسبقت
على المكان وعين خلّه غريقه
من الفرح لكن من بعدها ضقت
الوردة اللي عن يميني رقيقه
ذبلت ويجرح شوكها كل ما اشتقت
وأشياء مغلفها ومعها وثيقه
صارت رفات ومع غيابك ترى ارهقت
قلبٍ بذل لك فوق مالا يطيقه
وجرحٍ فراه الضيم لا من تطرّقت
بالله بسأل كان عنده طريقه
يمحي خياله كل ما نمت أو فقت
ويمحي طواري ذكرياتٍ عريقه
خلاص يكفي ما جرعته وما ذقت
وابطى لقانا عقب ماهو دقيقه
حسبي عليك الله ي مخلف الوقت