كشر ناب الحزن في وجهٍ يملاه الفرح والشوق
وبلال الضيق يصدح وأذّن بعالي مآذنها
رقى في منبر الحلق ولمس صوته دموع الموق
تهاوت دمعة المشروه للي ما درى عنها
دله ما كنّه اللي باني صروحٍ على المعلوق
تلوفه ذاريات الوجد تسفي به وتدفنها
بعد جيت السموأل بشتكي له غدرة المخلوق
لقيت محمد ابن العلقمي حاكم مداينها
غدر بي بعد ما ضيمه سطا بالخافق المفتوق
جروحي ترفع كفوفها وتدعي لأجل خاينها
رحل يودّه لنوق الفرح وتجاوبه ذي النوق
بعد ما أخلت مكانه من حشاي ومن مواطنها
تجاوب صوت من قفّى وأصيح بحسرتي مسروق
محل روضة بعد ما العشب بفياضه مزيّنها
تناحت من قفص صدري تدرهم من ورى الممشوق
بقت ذكرى تخالج بعد ما راح الولد منها
أمد الشوف وأنا في رجاء إنه يرجع المعشوق
مثل من شاهد جنازة محبّه ويتمعنها
طوى صفحة غرامه ما درى عن خافقٍ مرهوق
وأنا اللي ما ذخرت الود والصحبة مثمنها
بكيته يوم نفسي من فراقه قد لحقها عوق
تمسّك في طرف ثوب الغلا ووقفت ضعاينها
فمان الآه واللوعات وأدعي يا عساه يذوق
ما ذاقتها عيوني من سهر وجروح تحزنها
حفرت القبر ما صليت وأيبس من جفاه عروق
ضريحه داخلي مشؤوم مع ذكراه دافنها