قالت: تحْبني؟ قلت: ساعه وساعه
ما هوب دوم مْديم يا قرّة العينْ
قالت تقول الصدق والّا خداعه
قلت: الصحيح آقول لو ما بترضين
يمتاز حبّي بالصدق والنصاعه
ماني من اللي في هواهم مراوين
ما لي على الحب المديم استطاعه
أخشى يضيّع منّي العقل والدين
واخسر هوانا والحيا والمناعه
واصبِح مثَل بين الملا كالمجينين
قضَّى حياته في هيام ونياعه
بين البراري ما يهَبْط البلادين
خلّي الاقارب والأهل والجماعه
وافلس من الثنتين وتْعوّض البين
أحِبّ وادّي للمحبين طاعه
لكن في حدود العقل والعقل زين
قالت: حديثك هب صراحه بشاعه
وين اللطافه منك والعطف واللين؟
قالت.. وقَفَّت مِسرِعَه باندفاعه
وبْجيب من بعد الجفا بين نارين
يا شيخ يا من طال في الشِعر باعه
لي له اعلام القافيات الميامين
مجَنّحات يرَفْرِفِنْ في ارتفاعه
فخر الصديق ونقمةٍ للمعادين
ليتك تواسي قلب زاد الْتياعه
يا من يجدّينا على المسلك الزين
ضاق الفضا بي بعد رَحْب اتّساعه
من وين ايِيب الحل لمصيبتي وين؟