ياليت عندي بالمحبه قسايم
لأعطي حبيب الروح منها قسيمه
دايم اشوفه في مواصله نايم
وارجي من الله ليت ربي يقيمه
وجوي على المزيون بالحب غايم
ولامن تثنا زاد بالجو غيمه
وان احمد الله حظي اليوم قايم
والقلب ياسعده سكن في نديمه
وهذا زمانن صعب تلقى الندايم
حتى الرفيق الله وكيلك بقيمه
خذني على النيه وانا اجيك هايم
خذني حميمن دوم يرضي حميمه
انا عن الشينات يازين صايم
امشي بخطوطن كلها مستقيمه
ولا قد خذيت بهرج معتوه لايم
يروح البهيمه مثل ماجا بهيمه
والطيب فوق الراس مثل العمايم
وافكاري يالمزيون كلها سليمه
والصيت عند الناس بالخير عايم
ومنهو نطحني بلّغه بالهزيمه