التمني سهل والأحلام سلوى للأحبة
وحيلة المحروم يايمه ترا كثر الأماني
ماله إلا أنْ يتمنى شوف خلٍ ما يكبه
ويكتب الأحلام ثم يعيش حلمه في معاني
وش يسوي؟ من بلاه البعد واصبح وسط غبه
وش يسوي؟ من تمنى شوف خله لو ثواني
يشتكي من قو همه والحزن عاصف مهبه
مبتعد عن وصل خلانه عقب ما كان داني
لا غزاه الليل يرجي رحمةٍ من عند ربه
يمشي دروبٍ طويله كايده والعمر فاني
كيف ينسى صاحبٍ بالحب ضحى لجل حبه
وان نسى قامت تذكره القصايد والأغاني
كيف يطعم فرحة العيدين والاحزان سبه
سبةٍ للضيق يوم الحزن ساكن بالمحاني
أه يا جور الليالي تجرح اللي ما تنبه
وآه يامقسى الزمان اللي على الفرقا حداني
آه يمه والحزن فيني بنى له ألف قبه
آه يمه والفرح من عقب خلي ما احتواني
آه يمه والهوى بحرٍ عميقٍ من يطبه
ضاع في غبة مداه وطاح في قاعه يعاني
آه يمه والجروح اللي بحل فيها الأطبه
كل ما دويت جرحٍ ابتحلت بجرح ثاني
أه يمه جمر شوقي في خفوقي من يشبه
من يزيد الشوق فيني غير بعد اللي خذاني
يوم قفى والمرارة كاسها بيّن مصبه
اجرعه من حر ما بي والوداع اللي كواني
اتهيا للسنين القادمة والمستخبه
عل تحقيق الأماني يصير وافرح في ثواني