على الصفحات سطرنا وتبدى رحلة المجنون
على جنح الخيال اللي يشيل أفكار مجنونة
بدينا يالله الخيرة نغني بالقصيد لحون
لجل طرق يعانقني وأجاذب نغمة لحونه
تولم يا قلم واكتب تراني قمت اخيل مزون
اخيل إن الشعر وبل اشوف بعيني مزونه
ما دام ان الشعر نزف عسى نزف القلوب يهون
عسى ذاك الجنون اللي سكني زاد بفنونه
نبي ناخذ ونعطي بالشعر معنى على المضمون
ولا به خير في شعر يعاكس صدق مضمونه
حرام إني لخلي من قرا نزفي يجي مفتون
حرام إني لخلي كل هالعالم يغنونه
سما يا شعر وارقى بالسما حلق عليك عيون
جناحينك جزالة شاعر ينظم على هونه
سما فوق السحاب اللي يجي تحتك وهو مغبون
سما حول الثريا والجدي ابغاك من دونه
أنا والله لا مني كتبتك يعتريني جنون
نسيت الكل من حولي وعقلي هام بجنونه
أدوّر فكرتي وابحث عن الغالي عن المزيون
أدوّر ما يميزني لجل خفاق مزيونه
لجل اكسب غلاها وامتلكها والبشر يدرون
لجل لا من قرت نزفي تجيني حيل مفتونه
سقى الله قلبها اللي يوم جيته والعرب يحكون
وأنا اسمع في سوالفهم عن اللي ساكن ركونه
سكت اسمع سوالفهم ابعرف سرها المكنون
ابعرف من يبادلها الغلا والناس يطرونه
وضاع السمع وسط الهرج ابمسك للهروج غصون
وتاه الهرج من أذني والا يا مبعد غصونه
سألت الناس يا عالم ابعرف من هو المضنون؟
أنا مليت من حكي يغث الروح من لونه
تعبت وتعبت اسماعي ولا ابغى تختلف بي ضنون
ولا ابغى فكرة الشاعر تضيع بزحمة ضنونه
وفجأه كل من حولي لزم صمته وهو مشحون
واحس بصوت من خلفي يحاول يخفي شجونه
واحس بقرب مخلوق احسه يتقرب بمتون
وضع كفه على المتنين والمتنين بمتونه
اقدم خطوتي بلفه وأنا ارقب بالعيون جفون
وطاح الشوف بعيون هدبها يحمل جفونه
ورمش لا نزل كله قوي في سطوته ملعون
أحاول اقترب لكن أشوف الموت بعيونه
أناظر عينه اليمنى وأشوف السيف لي مسنون
وأناظر عينه اليسرى وأشوف رموش مسنونه
وأطالع واثرها بنت تشيل الزين سحر ولون
ولون السحر يا زينه تحتها العرش يبنونه
سقى الله صوتها اللي لا سرى يملا فضا هالكون
سمعته يومها تحكي وضعت شهور في كونه
سمعت حروفها غنت تعزف الضاد ويا النون
سمعت اجنونها نادى: مدد يا ضاد يا نونه
بدى منها الحكي قالت: هلابه حيل بن خلدون
هلا يالراوي اللي جيت تبغى قلب خلدونه
إذا انك جيت تسألني من اللي ممتلكها ركون
تعال وشوف خفاقي من اللي صار مضنونه
تفضل واخذ خفاق عشق شعرك عشقه فنون
تولم جيت لك بنت عليها العلم دندونه
أنا لي قلب ينبض لك غلا يوم البشر يبغون
بغوا نبضه لهم يمشي على الهقوه يتمنونه
أنا لي عين تنظر لك نظرها يستمد العون
نخى جفني نخى رمشي وقال الدمع ياعونه
ملكت الروح يوم الروح ترخص لك مع المليون
تغلغل حبك بروحي وصارت فيك مشحونه
يعيش الحب لو أن الخلايق كلهم يفنون
ويبقى حبك بقلبي لو أن الخلق ينفونه
هنا وقف حكيها وانتفض لجل الحكي دندون
وبدى نظم القصيد اللي أريد الكل يقرونه
بدى ذاك الجنون اللي بغيته يرسم الميسون
وحيا ذاك الخفوق اللي بغى بالحب ميسونه
أنادي بأسمها يا غادة وأنادي والعرب يوحون
واعلي الصوت يا غادة أبي هالناس يوحونه
يا غادة نعنبو جد الغرام اللي يجي بطعون
خذيتي ذنب خفاق هلك يا بنت بطعونه
حسبتك في هوى غيري وغيري معترض لي دون
حسبتك ميته بعشقه وفيه النفس مرهونه
ملكتي كل ما فيني وعقلي فيك هو مرهون
ترا لك وسط خفاقي مشاعر حب مدفونه
عشقتك كثر ما يعشق حروب الدهر نابليون
هويتك كثر ما يهوى صغير السن بالونه
احبك كثر زخات المطر يوم البدو يرجون
سحابة صيف وسميّه اله الكون يرجونه
احبك كثر ما ينبت من التين ومن الزيتون
كثر نبت الخزامى والنفل واللي يحبونه
تعالي واجلسي جنبي بغني بالقصيد لحون
بغني لك سما يا شعر حلق وانتي لحونه