يالهنوف اللي خذتني في زمان العنجهية
وأسرقت عمري غصيبه وفي هواها القلب ذايب
اقبلي يمي تعالي في طرف نجد العذيه
وامطريني عشق قلبك دام هو مثل السحايب
يافديت اللي لفتني في ليالٍ سرمديه
اشهد انه من فداها قلب (ملعون الصلايب)
مرحبا وأهلين يا بنت الأكارم يا بدوية
اقلطي وسط الخفوق اللي مسوي بي عجايب
واشربي من قهوة دلال الحروف الأبجدية
واقدعي من تمر شعري يوم صرتي من القرايب
يالهنوف اللي توردني على حوض المنية
منزلك فوق الثريا فوق يا شقر الذوايب
دامك اغلا الناس عندي وانتي اغلا نرجسيه
جعل (مسعد) فدوةٍ لك لا غديتي في نشايب
حبك اللي في خفوقي كثر زخات ابرديه
لا بعد اكثر واكثر زود يا اغلا الحبايب
ان سألتي عن دليلي ناظري عيونٍ شقيه
وناظري قلبٍ يحبك كلها عروقه عطايب
من عرفتك وانتي اغلا من سكن وسط البرية
ماخذه مني خفوقي طيب والا بالغصايب
وان بغيتي تجرحيني اجرحي واقسي عليه
مرحبا بالجرح منّك لو غدى صدري خرايب
وان بغيتي العمر جاك العمر يا نجلا هدية
افعلي بي ما بدالك سوّي انواع المصايب
والله انه ما ذبحني غير ذيك الناعسيه
ذابحتني بالهدب والرمش من ضمن السبايب
والنحر يحرسه ربي فيه سحر وجاذبيه
يوم اناظره ابعيوني قلت:هذى من الغرايب
يوم شفتك زاد حبك حب واعلا مقدريه
وامتلكتي حب قلبٍ اعتقد ماهو بتايب
ليتك اتمدين يدٍ ناعمه يالاجوديه
تتجه ليد (مسعد) بالمصافح في لهايب
لي ثمان شهور ودي اقترب منّك شويه
كنت خايف جور صدك يبتليني بالكرايب
ويوم جيتي وسط داري ثم زان الوصل ليه
قلت:هذي فرصتي يا تصيب والا اكون خايب
يمكن اننك تقبلين بخافقٍ له نار حيه
تشتعل بالجوف تحرق والضلوع الها حطايب
وان رفضتي الحب مالي غير اصفق في ايديه
منجبر أعيش عمري في ونين وفي نحايب
وان قبلتي سعد حظي يوم حبتني ابدويه
دامك انتي في عيوني ثامنة سبع العجايب