نافِق وجامِل وكل الناس يطرونك
يقولون: ما فيه مثلك واحدٍ ثاني
إن كنت صادق جميع الناس يشنونك
تصير مذنب كبير، وغيرك الجاني
يا اللي على نيتك لا تحسِن ظنونك
نيّتك هذي توديك بخبر كاني
اصدق وتلقى جميع الناس يرمونك
بقلة المعرفة زورٍ وبهتاني
لكن بيع الضمير وبين أسنونك
واضحك لهم زور، لو القلب ملياني
وجهين في وقتنا ما عاد يمشونك
كثّر وجوهك بحسب فلان وفلاني
لا تسمع أهل المبادئ، لا يهمونك
وإن طعتهم عشت طول العمر فقراني
راوغ تثعلب لديّانك ومديونك
تابع ميول الزمن في كل الأحياني
إن جاتك الفرصة اسرق، خلّص ديونك
الفرصة إن روحت ظلّيت ندماني
هذا زمان العب، العب بين أفنونك
وإن كنت غلطان قولوا: ليش غلطاني؟
وإذا تورّطت أنا، ما شوني بشونك
هرجت مثل البشر، والهرج مجاني